Bu günlərdə Azərbaycan Respublikası Milli Məclisi Aparatının rəhbəri Səfa Mirzəyevin rəhbərliyi ilə 1414 səhifəlik «Azərbaycan Respublikasının hərbi qanunvericilik ensiklopediyası» işıq üzü gö­rüb. Toplunun redaktoru Milli Məclis Aparatının İnzibati və hərbi qanunvericilik şö­bəsinin mü­diri Nizami Səfərov, tərtibatçısı isə həmin şö­bənin baş məsləhətçisi Eldar Əsgərovdur.
Dünya xalqlarının ordu quruculuğu sahəsindəki təcrü­bələrinin öyrənilməsi, xalqımızın sülhsevər və insanpərvərlik xü­susiyyətlərinin nəzərə alınması kontekstində gündən-gü­nə təkmilləşən hərbi qanunvericilik silahlı qüvvələrin fəaliyyəti ilə bağlı problemlərin zamanın tələbi səviyyəsində həllinə xidmət etməklə bərabər, həm də dövlətimizin təhlü­kəsizliyinin və mü­dafiəsinin təmin olunması istiqamətində gö­rü­lən məqsədyönlü işlərin qanunlar şəklinə salınmış təzahü­rü­nün göstəricisidir. Buna gö­rə də hərbi qanunvericiliyin öyrənilməsi hərbi qulluqçular üçün lazım olduğu qədər hərbi xidmət keç­mək kimi konstitusion vəzifə daşıyan hər bir vətəndaş üçün də vacibdir.
Demək olar ki, Azərbaycanda ən irihəcmli kitab olan bu topluda müstəqillik illərindən bu gü­nə kimi olan hərbi sahəyə aid bü­tün qanunlar, Milli Təhlü­kəsizlik Strategiyası, Hərbi Doktrina, hərbi nizamnamələr, əsasnamələr, Nazirlər Kabinetinin qərarları, silahlı qüvvələrin geyim formaları və fərqlənmə nişanları, silahlı qüvvələrin və ayrı-ayrı qoşun növlərinin bayraqları və onların təsvirləri, orden və medallar, onların təsvirləri, mü­dafiə nazirinin əmrləri, Konstitusiya Məhkəməsinin qərarları, məcəllə və qanunlardan çıxarışlar və s. yer alıb.
Ensiklopediyanın belə əhatəli və bö­yük həcmdə hazırlanması tərtibatçıların onu istifadə üçün daha səmərəli və yararlı etmək, hərbi qanunvericilik sahəsi üzrə qəbul edilmiş normativ hü­quqi aktları daha sanballı və kompleks şəklində oxuculara təqdim etmək arzusundan irəli gəlmişdir.
Eyni zamanda, kitabda bayraqların, ordenlərin və medalların dəqiq qrafik ölçüləri verilmişdir ki, bu da əyani təbliğat üçün əlverişli vəsaitdir. Bundan əlavə, ensiklopediyada Azərbaycan Respublikası Silahlı Qüvvələrinin, Dövlət Sərhəd Xidmətinin, Daxili İşlər Nazirliyinin hərbi qulluqçularının hərbi geyim forması və xü­susi rütbəsi olan əməkdaşlarının geyim forması və fərqlənmə nişanları da rəngli təsvirdə oxucunun diqqətinə çatdırılmışdır.
Kitabda hərbçilərin sosial mü­dafiəsi üçün bö­yük əhəmiyyət kəsb edən Azərbaycan Respublikası Nazirlər Kabinetinin qərarlarının öz əksini tapması ensiklopediyanın hərbi qulluqçular üçün faydalılığını daha da artırır.
Ensiklopediya hərbi sahədə çalışan mü­təxəssislər, eləcə də hərbi qanunvericiliklə bağlı informasiya əldə etmək istəyən hər bir kəs üçün nəzərdə tutulub. Kitabda göstərilən elektron ünvanlara (rafiq.07@mail.ru eldar_askerov@yahoo.com) oxucular rəy və təkliflərini göndərə bilərlər.